મોટા ધામ

તમે મેલ્યુ છે ગોકુળીયુ ગામ

કિધા દ્વારીકા માં મોટા મોટા ધામ

તડપાવી અમને ચાલ્યા શું કામ

હવે, તમને મળશે ના હૈયે મુકામ

હે મનડા તે મોહ્યા, ને દલડા તે લીધા

સઘળા ગોવાળીયા ને સખા તે કીધા

વાંસળી વગાડી ને સંમોહી લીધા

નઠારા આવા તમે કામ કેમ કીધા

હે કાન મોરલી ના અમે સુણ્યા નથી વેણ

તમારા કામણીયા અમે દિઠા નથી નેણ

ભવ ભવ ના તમે દિધા નથી લેણ

તમે કોઈ ના ય માન્યા નથી કહેણ

હે સુની છે થઈ આ કુંજ ની ગલીયારીઓ

હાલ્યા છો મેલીને ગોપીઓ નો સથવારો

રમશો ક્યારે આવી તમે રાત નો એ રાહડો

કીધો છે અન્યાય તમે મોટો તે આવડો

મીટ માંડી જુએ છે નમણી આ આંખડી

કરશો પાવન ક્યારે તમે શેરી આ સાંકડી

મીઠી વગાડવા ને તમારી એ વાંસળી

પાછા બોલાવતી વ્હાલી રાધા ગોવાલડી

- ગૌરાંગ નાયક