લાવ્યા'તા શું ને લઈ શું ગયા
જીવન જીવી, ને ખાલી હાથે નીકળી ગયા
બાળપણ, જવાની ને ઘડપણ, મજલો બધી કાપી ગયા
સફર માં બાંધી બંધનો, છેવટે તોડી ગયા
જીવનભર મીઠાં જ જળ પીવડાવી ગયા
જતા રહ્યા ને, નદીઓ ખારી વ્હેતી કરી ગયા
ઠેકાણું કાયમનું, અહીંથી બદલી ગયા
પણ, સરનામુ ત્યાં નુ દેવાનું ભૂલી ગયા
- ગૌરાંગ નાયક
તમે મેલ્યુ છે ગોકુળીયુ ગામ
કિધા દ્વારીકા માં મોટા મોટા ધામ
તડપાવી અમને ચાલ્યા શું કામ
હવે, તમને મળશે ના હૈયે મુકામ
હે મનડા તે મોહ્યા, ને દલડા તે લીધા
સઘળા ગોવાળીયા ને સખા તે કીધા
વાંસળી વગાડી ને સંમોહી લીધા
નઠારા આવા તમે કામ કેમ કીધા
હે કાન મોરલી ના અમે સુણ્યા નથી વેણ
તમારા કામણીયા અમે દિઠા નથી નેણ
ભવ ભવ ના તમે દિધા નથી લેણ
તમે કોઈ ના ય માન્યા નથી કહેણ
હે સુની છે થઈ આ કુંજ ની ગલીયારીઓ
હાલ્યા છો મેલીને ગોપીઓ નો સથવારો
રમશો ક્યારે આવી તમે રાત નો એ રાહડો
કીધો છે અન્યાય તમે મોટો તે આવડો
મીટ માંડી જુએ છે નમણી આ આંખડી
કરશો પાવન ક્યારે તમે શેરી આ સાંકડી
મીઠી વગાડવા ને તમારી એ વાંસળી
પાછા બોલાવતી વ્હાલી રાધા ગોવાલડી
- ગૌરાંગ નાયક
ઠાર્યા હશે તો ઠરશો
આપ્યુ હશે તો પામશો
પાંગરીને મદિલી બની તમારી અદાઓ
તમા નથી પણ, ક્યારેક તમેય કરમાશો
કાયમ કદી ક્યાં કોઈ જીતી શક્યુ છે
ફાવતા રહ્યા છો પણ, ક્યારેક તમેય શેહ ખાશો
જોજનવંતો જોશ થઈ રહ્યો છે બેકાબૂ
ભુલો છો પણ, ટમટમી ને જ ઓલવાશો
કલ્પક થવાના કરતા રહ્યા છો ડોળ
ઉન્મત્તતા ની સુચી માં પણ, આપ જ ઉમેરાશો
કંઈક ને કચડી, પહોંચ્યા છો શીખરે
સમય ના ચક્રાવા માં એક દિ, ખૂદ ઢળી જાશો
- ગૌરાંગ નાયક
હું હતો તમે હતા ને એ શામ હતી
કરવાની ઘણી અમારે કંઈ વાત હતી
બોલવા માં કદી મને છોછ ન હતો
જીભ ઊપર પણ આજે મણો નો બોજ હતો
અકળામણ જોઈ સ્મિત તમારુ લ્હેરાયુ
મનમાં મારા ધુમ્મસ કંઈક ઓર ઘેરાયુ
શરુ ક્યાંથી કરુ એ ય ના સમજાયુ
કેમ છો પુછવાનુય ના પુછાયુ
લાંબા સમયથી હતી જે ની પ્રતીક્ષા
ક્ષણે એ સ્થિતી મન ની હતી મુંઝવણ માં
પૂરો થયો અમારો ટૂંકો વાર્તાલાપ
મન માં હજી શરુ કર્યોય ન તો આલાપ
ન ઘટેલી મુલાકાત નું થતુ નથી અર્થઘટન
જીવંત રહેશે પણ એ વાત આજીવન
- ગૌરાંગ નાયક
